Ligjëratë e Hapur: Fati i liberalizimit të vizave dhe i dialogut mes Kosovës dhe Serbisë

“Raportet e Kosovës me BE-në në rrethanat e reja: Fati i liberalizimit të vizave dhe i dialogut mes Kosovës dhe Serbisë”, është tema e ligjëratës së hapur nga z. Agustin Palokaj që do të mbahet nga Shkolla për Integrim Europian.

Ky aktivitet, i cili do të zhvillohet më 18 prill 2017, do të trajtojë disa prej temave më të mprehta që lidhen me zhvillimet rajonale dhe ndërkombëtare që prekin Kosovën.
-    Çfarë pritet për liberalizimin e vizave për Kosovën?
-    Cilat janë sfidat me të cilat po përballet sot Bashkimi Europian?
-    Si ndikojnë ato në dialogun Kosovë-Serbi dhe më tej, në situatën e ngarkuar në Ballkan?
-    Si ndikon situata në BE posaçërisht për rastin e Kosovës, sa i takon liberalizimit të vizave dhe procesit të integrimit?

Këto dhe pyetje të tjera me rëndësi do të trajtohen në mënyrë konkrete dhe të drejtpërdrejtë në ligjëratën e hapur mbi sfidat nëpër të cilat po kalon liberalizimi i vizave dhe procesi i integrimit europian të Kosovës.

Fondacioni Kosovar për Shoqëri Civile (KCSF) ofron këtë mundësi për informim të thelluar ndaj këtyre çështjeve të ndjeshme përmes Shkollës për Integrim Europian.

Ndër pika të tjera me peshë aktuale do të diskutohen:

  • Ndikimi i Brexit dhe i sfidave të tjera në BE, dhe në angazhimin e saj në Ballkan
  • Qasja dhe vullneti real në BE për heqjen e vizave ndaj Kosovës
  • Ngërçi në zbatimin e marrëveshjeve ndërmjet Kosovës dhe Serbisë
  • Sfidat në zbatimin e MSA-së dhe çfarë pritet pas saj


Për shkak të vendeve të kufizuara, të interesuarit inkurajohen fuqimisht që të regjistrohen sa më parë. Përparësi do t’u jepet atyre që shprehin të parët interesimin për pjesëmarrje. Për t’u regjistruar, ju lutemi që informatat e kërkuara më poshtë t’i dërgoni te [email protected] deri me datë 14 prill, ora 18:00.
Emri dhe Mbiemri    Organizata    Pozita        E-mail


Jetëshkrim përmbledhës i Agustin Palokaj


Korrespondent nga Brukseli për “Koha Ditore” dhe “Jutarnji list”

Augustin Palokaj punon si korrespondent politik në Bruksel që nga viti 1998. Ai është korrespondent i gazetës së përditshme kosovare “Koha Ditore”, televizionit KTV dhe i të përditshmes kroate “Jutarnji list”. Në analizat dhe shkrimet e tij, ai kryesisht merret me politikën e jashtme dhe atë të sigurisë të BE-së, çështjet e zgjerimit dhe lidhjet në mes të BE-së dhe shteteve nga Ballkani Perëndimor.

Augustin Palokaj u lind në Kosovë më 1969. Ai përfundoi shkollën e mesme në Gjimnazin e Pejës. Që nga viti 1990 jeton në Kroaci. Z. Palokaj ka të përfunduar magjistraturën për Gazetari në Fakultetin e Shkencave Politike në Universitetin e Zagrebit. Z. Palokaj punon si gazetar profesional që nga viti 1993. Ai filloi karrierën e tij si korrespodent në luftën e Kroacisë dhe Bosnje Hercegovinës për të përjavshmen “Koha” dhe rrjetin botëror BBC (seksionin shqiptar dhe kroat).

Ai ka shkruar dhe për IWPR, Radio “Europa e Lirë”, “Vecernji list” dhe shumë botues të tjerë. Artikujt e tij janë publikuar në disa gazeta pjesë të Grupit Medial WAZ në Gjermani, Hungari, Bullgari dhe Rumani.
Z. Palokaj punoi për dy vjet si profesor asistent në Fakultetin e Shkencave Politike në Zagreb. Z. Palokaj ka marrë pjesë si panelist dhe folës në shumë konferenca në Europë e gjetiu. Ai është shpërblyer si gazetari i vitit në Kosovë më 2002 dhe Gazetari më i mirë i medias së shkruar në Kroaci më 2005. Që nga viti 2005 ai është ligjërues i rregullt në Shkollën për Integrim Europian.

Vërejtje: Përfaqësuesit e mediave dhe gazetarët inkurajohen të marrin pjesë në këtë ligjëratë. Megjithatë, ky aktivitet nuk është i hapur për mbulesë mediale.
 

Info të shkurta

Thirrje për Aplikim në Shkollën për Integrim Europian

Shkolla për Integrim Europian shpall fazën e aplikimeve për pjesëmarrje në edicionin e 23 të saj, i cili do të mbahet gjatë periudhës tetor-dhjetor 2017. Përmes 4 punëtorive nga ligjërues me ekspertizë të lartë në çështjet e integrimit europian, kandidatët e përzgjedhur do të marrin dije thelbësore dhe funksionale.

Çfarë është Shkolla për Integrim Europian?

Shkolla për Integrim Europian (www.shkollaeuropiane.org) është një projekt i nisur në vitin 2005 nga Fondacioni i Kosovës për Shoqëri të Hapur – KFOS dhe i zbatuar nga Fondacioni Kosovar për Shoqëri Civile – KCSF. Shkolla ofron një program të veçantë të ngritjes së njohurive mbi historikun, institucionet, kornizën ligjore, politikat kyçe në BE, si dhe perspektivën e integrimit europian të rajonit, me fokus në marrëdhëniet Kosovë-BE. Qëllimi kryesor i Shkollës është përgatitja e kuadrove rreth sfidave të integrimit europian.

Arritjet e Shkollës
Deri më sot, 1080 pjesëmarrës janë diplomuar nga Shkolla për Integrim Europian përmes programit të saj të larmishëm dhe dinamik. Gjatë këtyre viteve, pjesëmarrës nga sektorë të ndryshëm si administrata publike, shoqëria civile, mediat, bizneset, organizatat e ndryshme profesionale dhe zyrat ndërkombëtare në Kosovë, janë aftësuar që njohuritë e fituara t’i transferojnë dhe përdorin në punën e tyre.

Programi
Shkolla do të ofrojë modulin me 4 punëtori për një grup prej 20 të përzgjedhurve në temat:

1.    Institucionet dhe vendimmarrja në Bashkimin Europian, 16-17 tetor 2017
2.    Korniza ligjore e Bashkimit Europian: acquis communautaire, 25-26 tetor 2017
3.    Politikat kyçe të Bashkimit Europian, 8-9 nëntor 2017
4.    Kosova dhe Bashkimi Europian, 30 nëntor 2017


Të gjitha punëtoritë do të mbahen në Prishtinë dhe përgjatë gjithë ditës. Pas përfundimit të 4 punëtorive, pjesëmarrësit do t’i nënshtrohen testit vlerësues dhe kandidatët e suksesshëm do të pajisen me certifikatë.

Kush mund të aplikojë?
Të drejtë aplikimi kanë të gjithë qytetarët e moshës madhore që veprojnë në Kosovë dhe që janë në marrëdhënie pune. Përparësi në përzgjedhje do të kenë kandidatët të cilët dëshmojnë se pjesëmarrja do t’i ndihmojë me njohuri institucionit apo organizatës në të cilën ata punojnë. Pjesëmarrësit do të njoftohen paraprakisht për ndryshime eventuale në datat e mbajtjes së punëtorive.

Aplikacioni plotësohet online dhe duhet të përmbajë të gjitha dokumentet e mëposhtme:

1)    Formulari për aplikim i plotësuar online (webfaqja www.shkollaeuropiane.org);
2)    Rezyme profesionale – CV;
3)    Letër motivimi për pjesëmarrje (ju lutem specifikoni përvojat tuaja të mëparshme lidhur me temën, arsyet për t’ju bashkuar Shkollës si dhe mënyrat se si pjesëmarrja do të kontribuonte në zhvillimin tuaj të mëtejshëm);
4)    Letër rekomandimi e dedikuar për këtë shkollë (nënshkruar dhe e vulosur nga punëdhënësi).


 Afati i fundit për aplikim është 29 shtator 2017, ora 12:00
Vetëm kandidatët e përzgjedhur do të kontaktohen përmes email-it. Informata më të hollësishme mund të gjeni në webfaqen e Shkollës www.shkollaeuropiane.org ose çdo ditë pune prej orës 10:00-12:00 në tel. 038 248 - 636 ose përmes email adresës [email protected].                                                                              
 
Shënim: Pjesëmarrja në këtë Shkollë ofrohet pa pagesë dhe kandidatët e suksesshëm pajisen me certifikatë të pjesëmarrjes.


Përkrahur nga: